Grupi parlamentar i BDI-së kërkon të shkarkohet anëtari i Lëvizjes Besa në Komisionin për emërime dhe shkarkime, Fadil Zendeli dhe në vend të tij të emërohet Ejup Halimi nga BDI, përcjell Telegrafi Maqedoni.

Zendeli thotë se me këtë propozim eliminohet opozita shqiptare në këtë komision dhe rrezikohen vlerat demokratike. Ai madje paralajmëroi se pas këtij propozimi nuk do të marrë pjesë në seancat e Komisionit.

“Kur nga ana e kryesuesit u lexua kërkesë e tillë, unë kërkova pushim dhe e lëshova sallën. Sepse kur me praninë time ka kuorum për seancë, kjo është akt i turpshëm nga ana e shumicës parlamentare, deputetët që ishin të pranishëm nga grupi i LSDM-së dhe partnerëve të tyre, BDI. Është keqpërdorur demokracia, gjegjësisht kishte tentativë të rrezikohet vlera demokratike dhe politike e këtij institucioni”, deklaroi Zendeli./Telegrafi/